Pumpiers Samedan-Puntraschigna

Dal 2010 ho la Sgüraunza d’edifizis dal Grischun – in collavuraziun culs cumands da pumpiers da S-chanf fin a Malögia – elavuro ün concept per las structuras da pumpiers illa regiun da l’Engiadin’Ota. Il concept prevzaiva trais sectuors: Malögia fin Schlarigna, La Punt fin S-chanf e Samedan, Puntraschigna e Bever. Bever ho già dal 2010 surdo las incumbenzas da pumpiers a la vschinauncha da Samedan. Pels 1. schner 2012 haun fusiuno ils pumpiers da Samedan e Puntraschigna e’s preschaintan daspö lo scu pumpiers da Samedan-Puntraschigna. Ulteriuras infurmaziuns davart la fusiun resp. ils pumpiers do gugent sar Dragan Savic T 078 687 40 33.

Pumpiers giuvenils Gravatscha

Il böt da la scocieted «Pumpiers giuvenils Gravatscha» es que da familiariser a giuvenils traunter 12 e 16 ans a maun da gös e divertimaint cullas lavuors dals pumpiers. Iffaunts e giuvenils da Samedan, Puntraschigna e Bever e da La Plaiv paun dvanter commembers da la societed e chatter uschè ün passatemp radschunaivel. Impü vain cotres schligerieu l’entreda tals pumpiers e pussibilto tela già a partir da 16 ans. Ses fin och voutas l’an haun lö exercizis. Ulteriuras infurmaziuns do gugent il cumandant dals pumpiers giuvenils, sar Florian Flück, T 079 413 05 16.

Dans da fö

Ils motivs principels per dans da fö:

40 % defets vi dad indrizs ed apparats electrics
11 % installaziuns da s-chuder ed alluntanamaint sbaglio da tschendra
10 % adöver sbaglio da chandailas e prodots da fümer
1 % incendiamaint (Brandstiftung)

Che’s po fer?

controller ils indrizs ed apparats electrics
adöver precaut da chandailas e prodots da fümer
separer urdegns per impizzer da materias inflammablas

Incendi

Sch’Els/Ellas vessan da s’inaccordscher d’ün incendi, schi ch’Els/Ellas claman immediatamaing als pumpiers: telefon 118

Ils pumpiers vegnan dalum alarmos tres ün sitem d’alarm modern.

Las reglas sun cleras:

alarmer als pumpiers: telefon 118
salver a persunas e bes-chas
serrer e lascher serredas las portas
cumbatter il fö taunt scu pussibel

Displaschaivelmaing capita que adüna darcho cha bgera glieud s’inaccordscha bainschi d’ün incendi, ma ch’üngün nu telefona al 118. Perche mê? S’ho temma da clamer in agüd a qualchün e da stuvair zieva pajer? La ledscha prescriva cha las intervenziuns dals pumpiers tar incendis d’edifizis succedan sainza cuosts. Dimena nu do que üngün motiv d’esiter! Forsa crajan tuots cha qualchün oter hegia già alarmo als pumpiers, cur ch’els svess vezzan il fö.

Ch’Els/Ellas nun esiteschan i’l cas urgiaint d’alarmer als pumpiers, perche cha’ls prüms minuts sun ils pü importants!